Zawgyi Version
အရွေ့နှေးလွန်းတဲ့
စစ်တုရင်ပွဲကိုစောင့်ကြည့်ရသလိုမျိုး
သိကြားမင်းဟာ ငိုက်မျည်းရင်း မိုးချိန်းသံပေးရော့သလား
တစိမ့်စိမ့်ရွာတဲ့ သောကြာနေ့လယ်ခင်းဟာ
ပျင်းတိပျင်းရွဲ့နိုင်လွန်းတယ်။
ဓူဝံကြယ်ဟာ မြောက်အရပ်မှာပဲနေရလို့
အထီးကျန်ဆန်ဖူးသလားတွေးတိုင်း
ခေါင်းယမ်းရင်းပြုံးရတဲ့ မချိပြံုးတွေ
ခဏခဏချမိတဲ့ သက်ပြင်းတွေသာများလာရဲ့။
ဒီလိုနဲ့ပဲ
အနှေးပြကွက်မှာ
အတိတ်ဟာပြတ်ပြတ်သားသားထင်တိုင်း
စပျစ်သီးထက် ပန်းသီးကချဉ်မြဲ။
ပျံ့လွင့်လာတဲ့မင်းရယ်သံသဲ့သဲ့မှာ
အရင်လိုပူနွေးစိုစွတ်မှုတွေပါနေတုန်းလားလို့
ခုထိ
ခပ်ဝေးဝေးက လှမ်းကြည့်ချင်မိတုန်း။
တော်ပြီကွယ်။
အစရှာမရအောင် ရှင်းနေတဲ့အလုပ်ထဲ
ငါ့အတွက် နေ့လယ်စာ
ကော်ဖီတစ်ခွက်ပဲ မှာလိုက်တယ်။
၁၁ ဒီဇင်ဘာ ၂၀၁၅
No comments:
Post a Comment