Internetworking ကို လေ့လာသူတိုင်း သီအိုရီတွေ၊ သင်ခန်းစာတွေနဲ့ တွဲဖက်လေ့လာစမ်းသပ်နိုင်ဖို့ Lab တစ်ခုမရှိမဖြစ် လိုအပ်ပါတယ်။ ဒီလို Lab တည်ဆောက်ရာမှာ ပစ္စည်းအစစ်တွေကို အသုံးပြုနိုင်ရင်တော့ အကောင်းဆုံးပေါ့။ ဒါပေမယ့် ကုမ္ပဏီကြီးတွေဖြစ်တဲ့ cisco, juniper ရဲ့ router, switch စတဲ့ ပစ္စည်း အစစ်တွေက အသစ်မပြောနဲ့ အဟောင်းစျေးတောင်မှ တော်ရုံလက်လှမ်းမမီနိုင်အောင် တန်ဖိုးကြီးပါတယ်။ အဲဒီတော့ စလေ့လာတဲ့သူတိုင်း Graphical Network Simulator တွေကိုပဲ အသုံးပြုပြီး လေ့ကျင့်ကြရတယ် ဆိုတာလည်း အားလုံးသိကြပြီးသားပါ။
Graphical Network Simulator တွေအနက် အခပေးရော အခမဲ့ထဲမှာပါ ရွေးချယ်စရာတွေ အတော်များ ပါတယ်။ Googling လုပ်လိုက်ရင် အလွယ်တကူတွေ့နိုင်တာမို့ အသေးစိတ်မရေးတော့ပါဘူး။ ရွေးချယ်စရာတွေ ထဲမှာမှ cisco certification တွေအတွက် အခမဲ့လည်းဖြစ်၊ သုံးရလွယ်ကူပြီး လူသိများတာက Cisco Packet Tracer နဲ့ GNS3 တို့ပါပဲ။
Cisco Packet Tracer
Cisco Packet Tracer ကို Cisco Systems က ထုတ်လုပ်တာပါ။ ခုဆို 6.0.1 အထိ ထွက်ရှိထားပြီး မကြာခင်မှာ 6.1 ထပ်မံထွက်ရှိတော့မယ်လို့ ကြေညာထားပါ။ အင်္ဂလိပ်၊ ရုရှ၊ ဂျာမန်၊ ပေါ်တူဂီ၊ စပိန်၊ ပြင်သစ် ဘာသာစကားတွေ နဲ့လေ့လာနိုင်ပြီး Linux ရော Microsoft Windows မှာပါ အသုံးပြုနိုင်ပါတယ်။
Packet Tracer 6.0 မှာ IOS 15 နဲ့ထွက်ရှိလာတာပါ။ Cisco 1941, 2901, 2911 router သုံးခု အသစ် ထပ်မံပါဝင်လာပြီး HWIC-2T, HWIC-BA modules တွေပါဝင်လာပါတယ်။ CCNP Route မှာလေ့လာရမယ့် BGP(border gateway protocol) configuration, CCNP Switch အပိုင်းမှာ မဖြစ်မနေ လေ့လာရမယ့် Cisco ရဲ့ HSRP(host-standby router protocol) ကိုလည်း အသုံးပြုလေ့ကျင့်နိုင်မှာ ဖြစ်ပါတယ်။
Packet Tracer version 6.1 ထွက်လာခဲ့ရင်တော့ Internet cloud device နဲ့ Cisco ASA Firewall ထပ်မံပါဝင် လာမယ်လို့ ကြေညာထားပါတယ်။ version 5.3 နဲ့ 6.0 ရဲ့ features တွေကို အောက်ကပုံမှာ နိုင်းယှဉ်ကြည့်နိုင်ပါတယ်။
အသုံးပြုမယ့်စက်အတွက်
– CPU: Inel Pentium III 1.0 GHz or better
– RAM: 512 MB နှင့်အထက်
– Storage: 300 MB of free disk space
– Display resolution: 1024 x 768 တို့ရှိရင်ရပါပြီ။
– Sound card နဲ့ speakers မရှိလည်း ကိစ္စမရှိပါဘူး။
Download လုပ်တဲ့အခါမှာလည်း Tutorial ပါတာနဲ့ မပါတာ နှစ်မျိုးရွေးနိုင်ပါတယ်။ ဖိုင်ဆိုဒ်နည်းနည်း ပိုကြီးပေမယ့် Tutorial ပါတော့ လေ့လာတဲ့အခါ ပိုပြီးအထောက်အကူဖြစ်ပါတယ်။
Cisco Packet Tracer အသုံးပြုထားတဲ့ Network Topology တစ်ခုရဲ့ ပုံပါ။
နောက်ဆုံး ထွက်ရှိထားတာက Version 0.8.6 ဖြစ်ပြီး မကြာခင်မှာ Version 1.0 ထွက်ရှိလာတော့မှာပါ။ ယခင်က Routing အတွက် အဓိကထားခဲ့ပေမယ့် 1.0 မှာ Switching အတွက် Feature တွေ အများအပြားပါဝင်လာမယ် လို့ ကြေညာထားပါတယ်။
IOS Image file တွေကို download ဆွဲပြီး အသုံးပြုရတာဖြစ်တဲ့အတွက် တကယ့် router, switch တွေနဲ့ အသုံးပြုလေ့ကျင့်ရတာနဲ့မခြားလို့ ပိုပြီးအဆင်ပြေပါတယ်။ ဘာကြောင့်ဒီလိုပြောရသလဲဆိုတော့ Cisco Packet Tracer မှာက အသုံးပြုလို့ရတဲ့ command တွေ အကန့်အသတ်ရှိနေလို့ပါ။
ကိုယ်တိုင်ကတော့ Cisco Packet Tracer ရော GNS3 ပါ နှစ်မျိုးစလုံး သုံးဖြစ်ပါတယ်။ နောက်ပိုင်းတော့ GNS3 ကိုပိုသုံးဖြစ်ပါတယ်။ GNS3 မှာ ASA Firewall, PIX Firewall, Eatherswitch router, IDM စတဲ့ Feature တွေ အမြောက်အများပါဝင်တဲ့အတွက်ပါ။ နှစ်ခုစလုံးမှာ အားသာချက်၊ အားနည်းချက်ကိုယ်စီ ရှိကြပါတယ်။
GNS3 က Packet Tracer လို software ကို install လုပ်ပြီး အသုံးပြုရတာလောက်တော့ မရိုးရှင်းပါဘူး။ GNS3 ကို စတင်အသုံးပြုဖို့အတွက် မဖြစ်မနေ လုပ်ဆောင်ရမယ့် အပိုင်းတွေရှိနေပါတယ်။ အဲဒါကို နောက်တစ်ပုဒ် သတ်သတ်ထပ်ရေးပါဦးမယ်။
စာကြွင်းအနေနဲ့ပြောရရင်..
နည်းပညာနဲ့ပတ်သက်လို့ ၂၀၀၆၊ ၂၀၀၇ လောက်က နာမည်တစ်ခုနဲ့ Tips and Tricks လေးတွေရေးခဲ့ဖူးပေမယ့် အဲဒီနောက်ပိုင်း မရေးဖြစ်တာအခုထိပါပဲ။ ကိုယ်တိုင်က လေ့လာမှုအားနည်းတာရယ်၊ တစ်ခုခုသိလာပြန်ရင်လည်း ကိုယ်လောက်တော့ လူတိုင်းသိနိုင်မှာပဲ ဆိုတဲ့အတွေးရယ်ကြောင့် သိတဲ့နည်းနည်းလည်း သိတဲ့အတိုင်းပဲ ထားခဲ့တာ များပါတယ်။
အခုတော့ Sharing is Caring ဆိုတဲ့ထုံးကို နှလုံးမူပြီး သိသလောက်လေးမျှဝေမယ်ဆိုတဲ့ စိတ်နဲ့ စရေးပါပြီ။ သိပြီးတတ်ပြီးတဲ့ အဆင့်မြင့်တဲ့ပညာရှင်တွေအတွက် မရည်ရွယ်ပါဘူး။ လုံးဝမသိသေးတဲ့သူတွေအတွက် တစ်စုံတစ်ခုအသိတိုးသွားဖို့သာ ရည်ရွယ်လိုရင်းပါ။ သိသူတတ်သူများဖတ်မိလို့ အမှားအယွင်း တစ်စုံတစ်ရာ တွေ့ရင်လည်း ချစ်ခင်စိတ်နဲ့ မဆိုင်းမတွထောက်ပြကြဖို့ ဒီစာလေးနဲ့ပဲ ဝမ်းမြောက်ဝမ်းသာဖိတ်ခေါ်လိုက်ပါတယ်။
No comments:
Post a Comment