ကဗျာဘူကေး ၃

Zawgyi Version

” ဒိုင်ယာရီရဲ့ နောက်ဆုံးစာမျက်နှာ “

နှင်းစက်လက်တွဲခိုနေတဲ့ စံပယ်အိုလေးရေ..
ဒီလကွယ်ညမှာပဲ
ဆုပ်ကိုင်ထားတဲ့လက်ချောင်းတွေကို
ဖြည်ချလိုက်ပါတော့။

တချို့လူတွေက
ဘဝမှာ ကြယ်တွေ ကြွေကျခဲ့သတဲ့
ငြိမ်သက်စွာ ခရီးနှင်ကြဦးပေါ့ကွယ်
ကိုယ့်မှာက..
နေတွေ လတွေတောင် ကြွေကျခဲ့ဖူးပါတယ်။

သွားတော့မယ်နော်..
ကံကြုံရင် ပြန်ဆုံကြဦးမှာပေါ့လို့
ကံမကောင်းသူတို့ရဲ့ မှိုင်းညို့သောလမ်းခွဲ
ကျောက်စရစ်ခဲတွေ အပြိုင်းအရိုင်း လွင့်ကြဲနေတယ်။

(ဘာဖြစ်ဖြစ် ကိုယ့်အပြစ်ပါပဲ)
လေရိုင်းတွေ ၀ိုင်းဝန်းကိုက်ခဲကြတဲ့
မီးလျှံစတစ်ခုလို ပြာညိုယိမ်းထိုး
ပြက္ခဒိန်မှာတော့ နက်ဖြန်ခါဟာ နာမည်ဆိုး မရှိပါဘူး။

ဒါပေမယ့် …
လွမ်းဆွတ်နေသူ တစ်ယောက်ရဲ့
ကြောက်မက်ဖွယ်ရာ အိပ်မက်များ
နှင်းဆီချွေ ရထားမှာ စူးစူးဝါးဝါး ဥသြဆွဲပစ်လိုက်တယ်။

ဒီည ..
နောက်ည ..
ဘယ်လိုမှ နိဂုံး ချုပ်မရပါဘူး
ဘီလူးဖမ်းသလို ကြမ်းတဲ့ လင်္ကာ
ငှက်ဆိုးတွေအိပ်မှ
တိတ်တဆိတ် ကိုယ်ရေးလိုက်ပါတယ်။

“ပျော်ခွင့်မပိုင်သော
ဒိုင်ယာရီ၏ နောက်ဆုံး စာမျက်နှာ ထက်၌”
နတ်သူရူးတွေ ကြဲပက်တဲ့
ကောင်းကင်ဘုံ အက်ဆစ်တစ်စက်လို
ရှအက်ကြေကွဲ ရှ…အက်…ကြေ…ကွဲ…
မင်နီတွေနဲ့ ရဲ လို့ပေါ့ကွယ်။

တာရာမင်းဝေ

Linux မှာ console cable သုံးဖို့လိုတဲ့အခါ

Zawgyi Version

Router, Switch, Firewall တွေကို console cable သုံးပြီး manage လုပ်ရတဲ့အခါ Windows မှာတော့ Termial Emulator အဖြစ် Putty ကိုသုံးကြပါတယ်။ Putty ကို install လုပ်ပြီး ကွန်ပျူတာက Manage Device ထဲမှာ ကိုယ်ရဲ့ COM port nubmer ကိုကြည့် serial ကိုရွေးပြီးချိတ်လိုက်ရုံပါပဲ။ Linux ကို အဓိကသုံးတဲ့သူတွေ အနေနဲ့တော့ console cable ကိုသုံးဖို့လိုတဲ့အခါ Minicom ဆိုတဲ့ application ကို အရင်ဆုံး install လုပ်ထားဖို့ လိုပါတယ်။

ပထမဆုံးအနေနဲ့ ကိုယ် manage လုပ်ဖို့လိုတဲ့ device, console cable နဲ့ computer နဲ့လိုပါတယ်။ များသော အားဖြင့် cisco device တွေကို manage လုပ်ရတာများတဲ့အတွက် cisco device နဲ့ပဲချိတ်လိုက်ပါတယ်။ ကိုယ့် ကွန်ပျူတာမှာ serial port ပါတယ်ဆိုရင်တော့ cisco device တွေမှာပါလာတဲ့ console cable နဲ့ တန်းချိတ်လိုက်ရုံ ပါပဲ။

USB port ကနေ တစ်ဆင့်ချိတ်မယ်ဆိုရင်တော့ linux ကို support လုပ်တဲ့ USB to Serial adapter တစ်ခု လိုပါတယ်။ ကိုယ်သုံးမယ့် device ကို boot မလုပ်ခင်မှာ အရင်ချိတ်ထားဖို့ပဲလိုပါတယ်။ ဒါမှ boot လုပ်တဲ့အခါ system ကသူ့အလိုလိုရှာမှာပါ။

“System > Administration > Synaptic Package Manager” ထဲမှာ Minicom လို့ရိုက်ပြီး package ကို လွယ်လွယ်ကူကူ install လုပ်နိုင်ပါတယ်။ ဒါမှမဟုတ် Terminal ကနေ command ရိုက်ပြီး install လုပ်ချင်ရင် တော့ Clt + Alt + T ကို ရိုက်ပြီး Terminal ကို ဖွင့်ပါ။

Debian/ Ubuntu Linux မှာဆိုရင်

$ sudo apt-get install minicom

ရိုက်ပြီး install လုပ်ပါ။

Red hat(RHEL)/ CentOS/ Fedora Linux မှာဆိုရင်

# yum install minicom

လို့ရိုက်ပြီး minicom ကို install လုပ်ပါ။ Install လုပ်ပြီးသွားတဲ့အခါ

$ sudo minicom -s

လို့ရိုက်လိုက်ရင် အောက်က box ပေါ်လာပါမယ်။

အရောင်နဲ့သုံးချင်သူတွေအတွက်ကတော့

$ minicom -s -c on

လို့ရိုက်လိုက်ရုံပါပဲ။ အောက်ကလို ပေါ်လာပါမယ်။

“Serial Port Setup” ကိုရွေးပြီး Enter လုပ်ပါ။ နောက်ပြီး အောက်က တန်ဖိုးတွေအတိုင်းဖြစ်အောင် ရွေးပါ။

E ကို နှိပ်ပြီး Line Speed တန်ဖိုးကို 9600 ဖြစ်အောင်ရွေးပါ။

F ကို နှိပ်ပြီး Hardware Flow Control မှာ No ကိုရွေးပါ။

A ကို နှိပ်ပြီး Serial Device ကိုရွေးပါ။ ပုံမှန်အားဖြင့် “/dev/ttyS0 ” လို့မြင်ရမှာဖြစ်ပြီး USB port နဲ့ချိတ်မှာဖြစ်တဲ့ အတွက် ttyS0 နေရာမှာ “/dev/ttyUSB0 ” ကိုလို့ပြောင်းရိုက်လိုက်ပါ။ Esc နှိပ်ပြီး Main Menu ကို ပြန်သွားပါ။ “Save setup as dfl” ကိုနှိပ်ပြီး Save ပါ။ Exit နဲ့ထွက်လိုက်ပါ။

Setup လုပ်ခဲ့တာကို  ပြန်စစ်ဖို့အတွက် Terminal မှာ

$ sudo minicom

လို့ရိုက်လိုက်ပါ။ password ရိုက်ပြီးတဲ့အခါမှာ cisco device နဲ့ ချိတ်ဆက်ပြီးဖြစ်နေပါလိမ့်မယ်။

Ctrl + A ကို နှိပ်ပြီး minicom ရဲ့ command တွေကို ကြည့်လို့ရပါတယ်။

Reference: https://help.ubuntu.com/community/CiscoConsole

ဝါလကင်းလွတ် သီတင်းကျွတ်

Zawgyi Version

သီတင်းကျွတ်လပြည့် အဘိဓမ္မာအခါတော်နေ့မှာ ရတနာသုံးပါး၊ မိဘနှစ်ပါးနဲ့ သင်ဆရာ မြင်ဆရာ ကြားဆရာများ၊ ခင်ပွန်းကြီးဆယ်ပါး၊ သီလဂုဏ် သမာဓိဂုဏ် ပညာဂုဏ်တို့နဲ့ပြည့်စုံကြတဲ့ သက်ကြီးဝါကြီးပုဂ္ဂိုလ်များ၊ ဆွေမျိုး မိတ်ဆွေ သင်္ဂဟများအပေါ်မှာ သိ၍ဖြစ်စေ မသိ၍ဖြစ်စေ ကာယကံ၊ ဝစီကံ၊ မနောကံတို့နဲ့ ပြစ်မှားစော်ကားခြင်းရှိခဲ့ပါလျှင်၊ ကျေးဇူးကန်းခြင်းရှိခဲ့ပါလျှင်၊ ကျေးဇူးချေဖျက်ခြင်းရှိခဲ့ပါလျှင်၊ ကျေးဇူးမဲ့စွာ ကြမ်းတမ်းရိုင်းစိုင်းယုတ်မာ ကြံစည်ပြောဆို ပြုမူဆောင်ရွက်မှုပြုခြင်းရှိခဲ့ပါလျှင် ထိုကျူးလွန်ခဲ့သော အပြစ်ကြီးအပြစ်ငယ်များကို ယခုအခါ ကောင်းစွာနှလုံးသွင်း ယုံကြည်စွာဖြင့် ဝန်ခံပါ၏၊ ဝန်ချပါ၏၊ တောင်းပန်ပါ၏၊ ကန်တော့ပါ၏။ အစဉ်သနားခြင်းအားဖြင့် မေတ္တာရှေ့ထား၍ သည်းခံတော်မူကြပါ၊ ခွင့်လွှတ်တော်မူကြပါ၊ ကျေအေးတော်မူကြပါ။

သီတင်းကျွတ်အခါသမယမှာ အားလုံး ကိုယ်စိတ်နှစ်ဖြာကျန်းမာချမ်းသာကြပါစေ…။

ဒီတစ်နှစ်တော့ သီတင်းကျွတ်လပြည့် “အဘိဓမ္မာအခါတော်နေ့” မှာ ဆီမီးပူဇော်တဲ့ပုံတွေရိုက်ဖို့ အခြေအနေမပေးလို့ ၂၀၁၁ တုန်းက မန္တလေးမြို့ အောင်တော်မူဘုရားမှာ ရိုက်ထားဖြစ်တဲ့ ဓာတ်ပုံတွေပဲ ပြန်တင်လိုက်ပါတယ်။

တိတ်

မိုးစုန်းစုန်းချုပ်မင့်ပဲ
နောက်ပြန်လှည့်ဖို့မပြောတော့ဘူး
တစ်က တစ်ရာအထိရေရင်း
ငြိမ်ငြိမ်လေး နေလိုက်တာပဲကောင်းမယ်

ဟွန်းတီးသံတွေရှည်လွန်းလို့
ကမ္ဘာနှစ်ခုကြားက သက်တန့်လေးအတိုင်း
ငါ့အတ္တကိုသိမ်းထားရတာလည်း
မရွာဘဲ ထစ်ချုန်းတဲ့မိုးလို

ကတိစကားမရှိဘူး
ကျေးလက်တေးသွားအတိုင်းပဲ ကမယ်

နောင်တဆိုတာ
အဖြေသိပြီးသား ခပ်ညံ့ညံ့ဘောလုံးပွဲကို
အစအဆုံးပြန်ကြည့်ရသလို
ဘာကိုမှန်းမသိ
ခံတွင်းချဉ်တယ်..။

မိုးငယ်
၄ အောက်တိုဘာ ၂၀၁၄