မုတ်သုန်မိုးတွေ အငြိုးတကြီးရွာချတုန်းက
ရေခံဖို့လိုနေတဲ့ စိတ်ကူးတွေ
စံပယ်ဖြူကို ဖေးကူပွင့်ခဲ့သလား..
လမ်းဟောင်းထဲမှာ ချန်ရစ်ထားတဲ့
တေလေအိပ်မက်တွေ
မမက်ဖြစ်တာကြာပြီ။
သုံးရာသီ မိုးကုတ်စက်ဝိုင်းမှာ
အဖြေမရှိတဲ့ မေးခွန်းတွေကြုံတိုင်း
ဘဝဟာ အယိုင်ယိုင်အလဲလဲ..
ကယ်ပါ ယူပါ အော်ဆဲ..
မှတ်သိစိတ်က အဖြေပေးတိုင်း
နာခံတတ်တဲ့ အလွမ်းဆိုတာ
ရံဖန်ရံခါကို သတိမရချင်သူရဲ့ ဆင်ခြေပါ။
သက်တံ့ကလေးရေ
သုညဟာ အမှန်လား အမှားလား
ဟင်းလင်းပွင့်နေတဲ့ ရင်ကို
မင်းမြင်သလို ဝေဖန်စမ်းကွဲ့..
တကယ်တော့
ငါဆိုတဲ့ကောင်ဟာ
နယ်ရုပ်ကလေးရဲ့မာယာမှာ
အသာတကြည် ဒူးထောက်ချင်ခဲ့တဲ့
ခပ်ည့ံညံ့ သူရဲအိုတစ်ယောက်ပါကွယ်။
မိုးငယ်
(၂၅ သြဂုတ် ၂၀၁၄)
